Shabu sa santos

CEBU, Philippines - Pwerting nakahilak sa usa ka babayeng gipasanginlang drug pusher human nasikop sa mga sakop sa Carbon Police Station ug nakuhaan og daghang drugas nga iyang gitagoan sa mga imahen sa mga santos sa ilang altar diha sa ilang balay sa Ermita Proper, Cebu City kagahapon sa buntag.

Armado sa search warrant ang kapulisan nga gipangulohan ni SPO1 Artemio Tumacay nga gi-isyu ni Regional Trial Court (RTC) Judge Wilfredo Navarro sa Branch 19 ning dakbayan sa Sugbo dihang gironda ang balay sa suspek nga si Juliefe Tulin, 33.

Matud pa ni SPO1 Tumacay nga daghan na sila og nadawat nga impormasyon batok sa maong babaye nga way panabi mamaligya og shabu diha sa iyang dapit apan tulin usab kaayong makadagan kon dunay polis.

Wala na nakalihok pa si Tulin nga mao pa gayo’y pagmata dihang misugat kaniya sa gawas ang mga polis.

Nakuha sa kapulisan sulod sa balay sa dinakpan ang tulo ka medium size, 17 ka gagmay nga pakete sa drugas nga mobalor og P30 mil ug cash money nga P800 nga ang uban nakuha nila sa usa ka sekretong butangan sa tiilan sa mga imahen sa santos. Apan hugtanong gihimakak ni Tulin nga iyaha ang maong drugas kay dugay na siyang niundang pagpamaligya niini.

Samtang nadakpan usab sa laing ronda pinasikad gihapon sa search warrant sa mao gihapong huwes ang gidudahang big time pusher nga si Atillano Quizon Jr. diha sa A. Lopez St., Calamba, Cebu City.

Ang mga sakop sa City Anti-Illegal Drugs Special Operation Task               Force (CAIDSOTF) pinangulohan ni Senior Inspector Eunil Avergonzado nakakuha og unom ka medium size nga putos sa drugas, usa ka .38 revolver ug P2, 300.

Atol sa maong operasyon nasikop ‘sab sila si John Edward Quizon, nga naaktohan nga nagsuyop og drugas, samtang sikop sab si  Paterno Cabrera, nga nakuhaan og lima ka paketeng gidudahang shabu.  (BANAT NEWS)