TCC ‘vacuum’ kay wa’y presidente
CEBU, Philippines - Adunay “vacuum” sulod sa Talisay City College gumikan kay wala’y presidente nga nilingkod.
Kini ang pamahayag ni Talisay City schools division superintendent, Woodrow Denuyo, ang kasamtangang board secretary sa TCC.
Usa na ka buwan human gitudlo sa TCC-Board of Trustees si Engr. Gamaliel Vicente Jr. isip acting president apan giingong nawagtangan kini og gana sa maong posisyon matud ni Denuyo.
Niadtong Hulyo 17, ang TCC mitudlo ni Vicente isip temporary caretaker sa kolehiyo human miluwat sa pwesto si Dr. Joseph Sol Galleon ug ang pagdumili pagdawat ni Dr. Ester Velasquez sa posisyon.
Si Vicente wala makalingkod hangtud karon human si Mayor Johnny De los Reyes wala mopirma sa iyang appointment papers tungod sa manifesto sa pipila ka mga estudyante, alumni ug faculty nga mibabag sa iyang pagkatudlo.
Matud sa maong manifesto nga dili haum si Vicente sa posisyon tungod kay "loaded with work" siya isip acting city engineer ug acting Dean sa University of the Visayas College of Engineering and Architecture.
Ubos sa TCC Charter, ang school president kinahanglan nga usa ka full time.
Sa pikas bahin, matud ni Vicente nga dili na niya ipamugos ang iyang kaugalingon nga molingkod sa maong katungdanan human nagdumili si De los Reyes sa pagpirma sa iyang appointment papers. (/GMR)(BANAT NEWS)
- Latest
