Manghimoay og fake money nadakpan pag-usab
CEBU, Philippines - Nasikop sa Parian Police Station ang usa ka lalaki nga naaktuhan nga nagsuyop og ilegal nga drugas ug nakuhaan pa og daghanang peke nga kuwarta diha sa Sitio Feathers, Barangay Day-as,Cebu City, sa miaging gabii.
Ang dinakpan naila nga si Nicolas Herrera, 54, nga nagpuyo ra ‘sab sa maong lugar. Matud pa ni SPO3 Oliver Glodove sa Parian Police Station nga nahinabi sa Banat News nga samtang nag-foot patrol ang grupo ni SPO2 Francisco Parilla, ilang naaktuhan ang suspek nga nagsuyop og drugas hinungdan nga ila kini nga gisikop.
Apan atol sa pagrekisa kaniya, dunay nakuha nga daghang peke nga kwarta nga naglakip sa 20 ka tag 500 pesos ug duha ka 1,000 peso bill uban sa ginamit na nga aluminum foils.
Sumala pa ni Glodove nga nasikop na ‘sab kaniadto ni Herrera tungod gihapon sa paghupot og peke nga kwarta.
Usa sa gisubay karon sa kapulisan kung asa gikan ug kinsa ang nag-supply sa dinakpan sa mga peke nga kwarta, apan sa unang pagkasikop kaniya mitug-an kining siya ra moprinta niini sa internetan.
Gitanggong na sa karsel sa Parian Police Station ang dinakpan nga pasakaan og kaso sa drugas ug paghupot og peke nga kwarta. (BANAT NEWS)
- Latest
