Kampanya vs drugs

CEBU, Philippines - Nakaiskor na usab ang kapolisan sa managlahing mga anti-illegal drugs operations sa managlahing mga lugar dinhi sa lalawigan sa Sugbo.

Nadakpan sa pagpangronda sa kapolisan ang giilang level 3 drug pusher sa Barangay Jugan, Lungsod sa Consolacion ug nasakmit ang 17  ka gramong shabu, rifle grenade ug .22 rifle kagahapon sa buntag. Si PO3 Arthur  Ariate sa Consolacion Police Station miila sa dinakpan nga mao si Nelson Abucay Pilapil, 47, ug nakuhaan og duha ka dagkong pakete nga shabu, usa ka medium nga gidak-on nga putos nga shabu ug 25 ka gagmay nga mga pakete nga ilang gibanabanang nagkantidad og P200,000  sa street value niini.

Nakuha usab ang P1,902 nga salapi nga gituohang halin sa drugas ug drug paraphernalia. Ang pagkasikop sa suspek pinasikad kini sa search warrant nga giluwatan ni Judge Teresita Galanida sa Branch 56 sa Regional Trial Court (RTC) 7 nga nagbase sa Dakbayan sa Mandaue.

Tabogon

Laing  nadakpan nga pusher og shabu sa pagpangronda nga gihimo mao si Ronel John Maceda  Manalili, alyas John, 18, ug habal-habal  driver diha sa Sitio Laray, Barangay  Managase, Lungsod sa Tabogon.

Nakuha nga ebidensiya sa kapolisan mao ang tulo ka gagmay nga paketeng shabu ug shabu paraphernalia human gi-serve ang search  warrant nga giluwatan ni RTC Judge Antonio Maringuran sa dakbayan sa Bogo.

Dalaguete

Samtang nakaipsot sa kamot sa balaod ang usa ka notadong tigpayuhot og ilegal nga drugas sa Barangay Malunes, Dalaguete  kagahapon sa sayong kaadlawon. Ang mga polis armado sa search warrant nga gi-isyu ni Regional Trial Court (RTC) Judge Maximo Perez sa Branch 19, batok ni Anecito Enero Jr., nagpuyo sa maong lugar. Nakuha sa kapolisan ang lima ka gagmay nga paketeng drugas, usa ka granada, usa ka cellphone ug duha ka motorsiklo nga gituohang maoy iyang gamiton sa ilegal nga negosyo.

Cebu City

Samtang gilarot sa Cebu City Public Safety Company (CCPSC) ang 150 ka punoan sa marijuana didto sa bukirang bahin sa Barangay Buot Taop, Cebu City, kagahapon sa alas 5 sa hapon.

Matud pa ni Supt. Melbert Esguerra ang hepe sa maong buhatan nga nahinabi sa Banat News, kini mitug-an nga usa ka impormasyon may labot gitanom nga marijuana sa maong lugar .

Lapu-lapu City

Dose ka mga gagmay’ng pakete ug usa ka medium size pack nga pulos may sulod nga gidudahang shabu ang nasakmit sa kapolisan sa dakbayan sa Lapu-Lapu diha sa Purok Gumamela, Barangay Looc sa miaging Miyerkules sa hapon pinaagi sa usa ka buy-bust operation. Nasikop sa kapolisan mao sila si Paul Boroy, 33, Ferdinand Nillama, 48, ug Jovelina Potot, 33,  mga residente sa mao nga barangay.

Mandaue City

Samtang duha ka gipasanginlang pushers ang nadakpan diha sa  Barangay Cambaro, Dakbayan sa Mandaue  Miyerkules sa gabii nga giilang sila si  Melvin Maramara, 31, ug Adam Agustin, 49, ang duha nakuhaan og usa ka  paketeng shabu ug  drug paraphernalia.  (BANAT NEWS)