Nigulgol sa liog sa guwardiya gikasohan na

CEBU, Philippines - Nasang-at na ang kasong pagpatay batok sa 23-anyos nga suspek nga nipatay sa guwardiya sa Vineyard Construction sa Tabok, dakbayan sa Mandaue kinsa gibunalan og tubo ug gigulgol  ang liog.

Si Antonio Chequito gitumbok nga suspek sa pagpatay kang Melchor Pasinable.

Matud ni Senior Insp. Genilo Veraque, hepe sa Presinto 3 sa Mandaue City Police Office (MCPO), nga magpabilin sa ilang detention cell si Chequito samtang wala pa maduso sa piskaliya ang information ngadto sa korte.

Nasayran sa kapolisan nga si Chequito nakahimo na og krimen sa dihang 14-anyos pa ug wala napriso subay sa Juvenile Justice and Welfare Act.

Matud ni Veraque nga base sa records nga ilang nakuha nga si Chequito maoy suspetsado sa pagpatay sa iyang agawon pinaagi sa pag-atsa 30 ka higayon.

Si Veraque miingon nga nakasulod og trabaho sa Vineyard Construction ang suspetsado ug dihang ilang gihimo ang pakisusi ilang nasuta nga ang hulagway sa igsoon niining lalaki maoy gibutang sa application form niini.  (BANAT NEWS)