Polis nga gireklamo wa pa’y aksiyon
CEBU, Philippines - Nagpabilin sa serbisyo isip pangulo sa Law Enforcement Section sa Lapu-Lapu City Police Office si Inspector Rogelio Amoroso kinsa gipasanginlang nanagpa, nangulata, nanion ug nagpabuto sa iyang armas niadtong Agosto 1 sa barangay Basak.
Matud ni Chief Insp. Eloveo Marquez, hepe sa Investigation and Detective Management Branch (IDMB) sa LCPO, nga gipaabot pa nila nga mosang-at og reklamo ang mga biktima batok kang Amoroso.
Nagpaabot usab ang kapolisan nga makig-alayon kanila ang mga biktima.
Ang mga biktima unang midangop sa National Bureau of Investigation gumikan kay wala sila’y salig sa kapolisan sa LCPO sanglit ilang opisyal si Amoroso.
Nasuta usab nga ang mga pasangil batok sa maong pulis hugot nga gipanghimakak ni Amoroso.
Siya mitataw nga dili siya hubog niadtong higayona ug wala usab mangulata ug nanion og armas.
Si LCPO Director, Senior Supt. Armando Radoc, mimando sa IDMB sa paghimo og imbestigasyon labot sa hitabo. Apan gipasabot ni Marquez nga di sila kapasagad og pasaka og kasong administratiba batok kang Amoroso kon wala’y kasong ipasaka ang mga reklamante. (BANAT NEWS)
- Latest
