Lalaki nakuhaa’g armas, drugas sa checkpoint

CEBU, Philippines - Nasikop sa checkpoint sa kapolisan ang usa ka lalaki nga nagdala og armas ug gidiling drugas sa may Veterans Drive, Lahug, dakbayan sa Sugbo sa niaging gabii.

Ang nadakpan mao si Virgilio Navales, 25, taga barangay Singsing, Balamban.

Alas 6 sa gabii nipahigayun og checkpoint ang kapolisan sa Mabolo Police Station gipangulohan sa deputy chief nga si Insp. Vincent Zozobrado.

Dihang gipahunong sa kapolisan ang motorsiklong gisakyan ni Navales ug gipaubos sa visual search, nakuha ang usa ka .38 revolver nga dunay unom ka bala ug tulo ka pakete sa ginadiling drugas.

Gipaubos usab sa ballistic examination ang armas nga nakuha aron pagsuta kon wala ba kini nagamit sa mga krimen.

Gitanggong sa Mabolo Police detention cell ang dinakpan nga gikatakdang pasakaan og kaso sa paghupot og ilegal nga drugas ug armas. (BANAT NEWS)