PNP naka-score vs drugas

CEBU, Philippines - Ang kapolisan daghan og kalampusan sa kampanya batok sa gidili nga matang sa drugas nga misangpot sa pagkasikop sa mga drug pushers ug misakmit og daghang pinakete nga shabu.

Ang mga operatiba sa Cebu Provincial Police Office (CPPO) misikop sa giingong notado nga drug pusher sa Carcar atol sa operation nga ilang gihimo didto sa Sibonga ug sa Barangay Tapon, Carcar niadtong Martes sa hapon.

Si Jonathan Dayagan, 44, taga Carcar una nga nadakpan didto sa Sibonga atol sa buy-bust operation nga gihimo sa hiniusa nga team sa mga polis gikan sa Provincial Anti Illegal Drugs Special Operations Task Group, Provincial Intelligence Branch ug Provincial Investigation Detection and Management Branch. Nasakmitan si Dayagan og pinakete nga shabu ug nasikop usab ang duha niya ka “bata-bata” nga sila si Rey Llanos, 55 ug Domingo Nacua, 45. Nakuhaan pa sila og kalibre 45 nga pistola. Human sa ilang pagkasikop, gidala sa kapolisan ang tulo ka dinakpan didto sa balay ni Dayagan sa Barangay Tapon, Carcar ug gi-search sa mga polis ang balay sa suspetsado base sa search warrant sa hukmanan.

Gawas sa 31 gramos nga shabu nga mokantidad og P372 mil nga nakuha gikan sa balay ni Dayagan, ang kapolisan nakasakmit usab og rifle ug lima ka bala sa .357 magnum revolver gikan sa balay ni Dayagan. Matud ni Dayagan nga dugay na siya nga miundang sa pagpamaligya og shabu. Wala siya moangkon nga iya kadtong mga shabu nga nakuha gikan sa iyang balay.

Si Rey Llanos miingon nga naapil lang g’yud sila pagkasikop apan nanghimakak og kalambigitan sa negosyo sa drugas.

Ang hepe sa PIB nga si Superintendent Rodulfo Albutra miingon nga usa ka semana ang pagpaniid nila sa kalihukan ni Dayagan ug sumala sa report nga ang suspek moabot sa pagpamaligya og drugas sa mga silingan nga lungsod sa Carcar. (BANAT NEWS)