Taga MCIA gi-seminar bahin bird strike
CEBU, Philippines - Gipaubos sa duha ka adlaw nga wildlife hazard management seminar ang mga operations personnel sa Mactan Cebu International Airport.
Kini aron malikayan ang pagka-disgrasya sa mga abyon tungod sa bird strike kun pagdagsa sa mga langgam sa agian sa mga eroplano.
Matud ni Engr. Nigel Paul Villarete, general manager sa tugpahanan, nga ilang nasuta sa pagtuon sa tanang mga tugpahanan sa tibuok kalibutan nga 90 porsiyento sa mga aksidente gilangkuban sa mga abyon gumikan sa mga langgam nga maigo sa pagtugpa ug paglupad sa mga eroplano.
Usa sa ilang gihimoan og pagtuon ang mga migratory birds kon unsang panahon ug unsa’y rason kon nganong modagsa ang mga langgam sa usa ka lugar.
Plano usab nila nga magtukod og wildlife hazard committee nga langkuban sa gobernador ug mga mayor sa mga lugar nga nasulod sa 13-kilometer radius gikan sa tugpahanan sama sa siyudad sa Lapu-Lapu, Mandaue, Cebu ug mga lungsod sa Cordova ug Consolacion.
Ang seminar gisugdan niadtong adlaw’ng Martes ug gitapos kagahapon ug gihimo usab kini sa ubang tugpahanan lukop nasud. (BANAT NEWS)
- Latest
