Manghod gidunggab sa maguwang
CEBU, Philippines - Usa ka lumolupyo sa Barangay San Roque, dakbayan sa Sugbo miunay pagdunggab sa iyang manghod nga hubog ug misulong didto sa iyang panimalay ug nanghagit og away kaniadto’ng Martes sa gabii.
Si Seigfred Acusar, 44, taga Deca Homes, Barangay Dumlog, Talisay nakaangkon og dinunggaban sa iyang kilid, ulo ug sa bukton ug gidala kini sa tambalanan.
Ang midunggab sa biktima nga si Ildebrando Acusar, 48, nagpuyo sa Barangay San Roque, Cebu City gidakop sa mga polis ug gidala sa Waterfront Police Station.
Nasayran nga si Seigfred kalit lang miabot didto sa balay sa iyang magulang ug matud pa nanghagis ug giguba pa ang pultahan sa balay.
Wala na makapugong ang iyang maguwang mao nga mikuha kini og duha ka kutsilyo gikan sa kusina ug gidunggab iyang manghod.
Si Sr. Inspector Wayne Magbanua, hepe sa Waterfront Police Station, nagkanayon nga ila na nga gibuhian ang magulang kay nagkasabot ra ang pamilya niini nga dili sila mopasaka og kaso.
Sumala pa ni Magbanua nga mibayad og P20 mil ang magulang ngadto sa iyang manghod nga mao sa’y gamiton sa iyang igsoon alang sa pagpatambal sa iyang mga samad. (BANAT NEWS)
- Latest
