Technician gipusil patay
CEBU, Philippines - Usa ka radiator repair technician ang gipusil patay sa duha ka wala mailhing lalaki samtang padulong kini mopauli sa iyahang balay diha sa Barangay Bankal sa dakbayan sa Lapu-Lapu.
Ang biktima mao si Randy Lincopines, 29 , nga nagpuyo sa Ramirez Drive, Barangay Bankal kinsa nakaangkon og samad pinusilan sa iyang nawong, abaga ug likod nga miresulta sa iyang hinanaling kamatayon.
Si Senior Police Officer Manolito Abellanosa sa Lapu-Lapu City Police Office Homicide Section miingon nga nahitabo ang pagpamusil alas 12:30 sa udto. Sumala pa nga gikan pa naghatud sa iyang anak ang biktima sa Bankal Elementary School ug padung na pauli apan pag-abot sa atubangan sa gate sa Camella Homes Subdivision Phase 1 kalit kining gibabagan sa duha ka lalaking nagmotor ug gipaulanan kini og bala.
Dali nga gidala ang biktima sa Mactan Doctors Hospital apan gideklarar kini nga dead on arrival. Nakuha sa crime scene ang duha ka basiyo sa kalibre 45 nga bala.
Ang asawa ni Lincopines nga si Sarah Mae, nagkanayon nga ang iyang bana saputon ug dali kining makakita og away, gituohan niya nga posibleng dunay nasilo sa iyang bana ug gibawsan kini.(/EIM)(BANAT NEWS)
- Latest
