Babaye nangasaba gidunggab

CEBU, Philippines - Nagkadugo nga nagpakitabang sa kapolisan sa Guadalupe Police Station ang usa ka babaye human gidunggab sa iya ra usab nga bayaw nga iyang gikasab-an sa paglabay og basura duol sa ilang tugkaran sa Cabajar, Guadalupe, dakbayan sa Sugbo niadtong Miyerkules. Ang  biktima naila nga si Amabelle Cabaña Buena, 40, minyo ug suspetado mao si Rufo Buena Jr., 40, parehong nagpuyo sa maong lugar.

Matud ni PO1 John Errick Samosa sa Homicide Section sa Cebu City Police Office nga nahinabi sa Banat News nga dugay na nga dili maayo ang panagtagad sa duha sa wala masayri nga hinungdan.

Gumikan sa kasuko sa suspek nga gikasab-an siya sa biktima, kalit kining mikuha sa dala niyang kutsilyo dayon dunggab tumong sa dughan sa biktima.

Ang biktima nakadagan paingon sa Police Station 9 nga naligo na sa dugo ug nangayo og pakitabang sa kapolisan.

Daling gidala sa Cebu City Medical Center ang biktima nga kritikal ang kahimtang diin sumala pa ni Samosa nga hapit gyud naigo ang kasing-kasing sa biktima.

Dali usab nga gisikop sa kapolisan ang suspetsado nga karon gitanggong na sa Guadalupe Police Station. (BANAT NEWS)