Drug suspects nasipong sa kapolisan

CEBU, Philippines - Duha ka mga gipasanginlang level 3 drug pushers nga matud pa miangkong gikan pa sa Cebu Provincial Drug Rehabilitation Center ang iyang supply, ang nangadakpan sa Liloan Police Station sa gilusad nga buy-bust operation sa Purok Molave, Tayud, Liloan. Ang  mga nasikop mao ang managsilingan nga sila si Armando Agacita, 24, ug Jocelyn Correa, 49, pulos nagpuyo sa maong lugar.

Matud pa ni Sr. Insp. Ramil Morpuz ang hepe sa Liloan Police Station nga nahinabi sa Banat News nga daghan na nga mga report ang ilang nadawat bahin sa ilegal nga negosyo sa duha.

Dihang nakompirmar sa ilang surveillance gihimo dayon ang buy- bust operation nga miresulta sa pagkasikop sa duha ka suspek.

Nakuha sa kapulisan gikan sa posisyon sa maong operasyon ang tag duha ka medium size nga putos nga drugas nga nagkantidad og dili mominos P10 mil.

Atol sa interogasyon sa duha giingong mitug-an sila nga gikan sa CPDRC ang ilang supply sa drugas. Ang hepe sa Provincial Intelligence Branch (PIB), Superintendent Rodulfo Albotra nga misusi na sa maong report, matud niya nga trabaho sa taga Bureau of Jail Management and Penology (BJMP) ug sa CPDRC ang pagsubay sa maong problema sa drugas. Si Gob. Hilario Davide III mimando na sa pagpaimbestigar sa maong report. 

Sa laing bahin, P20 mil nga kantidad sa drugas ang nasakmit sa City Intelligence Branch (CIB) ug sa San Nicholas Police Station atol sa ilang gihimo nga managlahing operasyon. 

Ang CIB midakop sa duha ka mga lalaki sa Sitio Huyong-Huyong, Barangay Bacayan, Cebu City nga sila si Karlo John Famador, 21, nga nakuhaan og 33 ka gagmay nga pakete sa gituhoang shabu nga taga Dita, Barangay Pulangbato, Cebu City ug Justin Velasquez, 21, taga Pit-os, Cebu City nga nakuhaan og 34 ka gagmay nga pakete sa drugas ug usa ka 22 magnum revolver nga dunay lima ka bala.

Matud pa ni Superintendent Romeo Santander ang hepe sa CIB nga lantaran ang pagpamaligya sa duha ka mga suspek nga giingong sakop lang sa usa ka dakong drug pusher sa maong dapit.

Samtang ang San Nicholas Police Station nakadakop sa usa ka Riza Pardillo, 21, taga Magsaysay Street, Barangay Suba ug nakuhaan og 20 ka paketeng may sud nga gidudahang shabu.

Sumala pa ni Senior Inspector Chuck Barandog ang hepe sa San Nicholas Police Station nga nahinabi sa Banat News nga dugay na nilang gi-monitor si Pardillo ug nianang tungora naatlan kining dunay ka-transaksyon hinungdan ilaha kining giduol apan midagan. (BANAT NEWS)