20 na ka brgy sa Asturias ang gilangaw

CEBU, Philippines - Gituohan nga miabot na og 20 ka barangay ang gihugpaan karon og mga langaw sa lungsod sa Asturias nga gidudahan sa mga residente gikan sa mga poultry farms sa ilang lungsod nga maoy hinungdan nga daghan nang nangasakit ilabi na ang mga bata. Ang Integrated Provincial Health Office sa Kapitolyo nag-imbestigar na bahin sa maong reklamo sumala pa ni Gobernador Hilario Davide III.

Apan si Provincial Health Officer Cynthia Genosolango sa pakighinabi sa Banat News nagkanayon nga wa pa silay gidaghanon sa mga nasakit tungod niini ug kung langaw ba gyud ang hinungdan tungod kay padayon pa silang naghimo og inspeksyon ug imbestigasyon.

Matud pa ni Genosolango nagduda nga posibleng ang mga iti sa manok nga gipanghatag gikan sa duha ka poultry farms ngadto sa mga mag-uuma aron mamahimong abuno maoy hinungdan niini.

Kini human nasuta nga ang wala magamit nga mga sinako nga iti gipangdan-ok ra sa daplin sa mga dalan sa mga mag-uuma, mao nga gitapuk-an kini sa mga langaw ug anha usab sila mangitlog maong midaghan.

Tungod niini, si Genosolango mibutyag nga gimando ni Mayor Allan Adlawan nga ipahipos ang mga sinakong iti.

Sa pagkakaron, nagpahigayon sila og misting gamit ang kemikal nga pangpatay sa mga langaw ilabi na sa mga gipangdan-ok nga sinakong iti nga wa magamit.

Una niini, pito lang ka barangay ang unang naapektahan nga mao ang Agtugok, Bago Old, Bago,  Langob,  Looc, Lunas ug Poblacion. (BANAT NEWS)