Mga mananagat mireklamo kay ilang agianan nasirad-an
CEBU, Philippines - Mitiyabaw ang mga mananagat sa Sitio Mangal, Barangay Punta Engaño sa dakbayan sa Lapu-Lapu tungod kay gisirad-an na sa nakapalit nga developer ang ilang lutsanan padung sa dagat.
Ang mga molupyo mibutyag nga sa pagkakaron mihimo na lang sila og hagdanan aron lang makaagi paingon sa dagat.
Matud pa sa mga residente nga duna nay koral daan ang maong lugar apan giingong gipatas-an kini sa developer sa luna ug sila nagduda nga ilegal kini kay way fencing permit nga gipaskin.
Nasayran nga giingong gipanag-iya sa usa ka Potenciana Daitol ang dul-an pito ka ektarya nga luna sa Sitio Mangal ug napalit ni Rene Espina nga giingong dunay joint venture sa usa ka subdivision nga kompanya.
Nasuta ‘sab nga gi-demolish usab ang mga nanimuyo sa lugar tungod kay tukoran kini og subdivision ug ang mga naapektuhan gihatagan og relocation site. Kapin sa 20 ka mga molupyo ang gibayran na og tag 25-mil pesos ug gihatagan og tag 30-metro kwadrado nga luna sa maong developer.
Si Punta Engaño Barangay Captain Lourdes Ibag miingon nga may gihatag nga agianan sa mga molupyo sa ilang panagatan apan tungod sa maong reklamo mipasalig kini nga makigkita sa tag-iya o sa developer aron masulbad ang reklamo sa mga residente.
Ang mga apektadong residente gikatakdang mopadangat sa ilang reklamo ngadto kang Lapu-Lapu City Mayor Paz Radaza. - /EIM) (BANAT NEWS)
- Latest
