SWAT sa Talisay gilusad
CEBU, Philippines- Pormal na nga gilusad ang Special Weapon and Tactics (SWAT) sa dakbayan sa Talisay kagahapon sa buntag.
Ang pangulo sa Police Regional Office-7, Chief Supt. Prudencio Tom Bañas ug direktor sa Cebu Police Provincial Office, Senior Supt. Noel Gillamac ang nitambong sa kalihukan.
Gipakita sa bag-ong naumol nga SWAT ang gilas sa pagluwas sa mga pasahero sa bus nga gi-hostage ug sa pagsikop usab sa suspetsado.
Si Supt. Reycel Carmelo Dayon, hepe sa kapolisan sa dakbayan sa Talisay, nagkanayon nga ang SWAT daku kaayo og tabang sa pagpakunhod sa insidente sa krimen sanglit ang mga badlongon magpanagana na tungod sa presensiya sa SWAT.
Gihangyo sa hepe si Mayor Johnny De los Reyes nga mapadali ang pagpalit sa siyudad og mga motorsiklo nga gamiton sa SWAT sa ilang pagpatrolya.
Nanghinaut usab si Dayon nga magahinan og budget sa siyudad alang sa mga assault rifle sa SWAT.
Subay niini, si De los Reyes nagkanayon nga gimanduan na niya si Konsehal Danny Caballero, vice chairman sa committee on peace and order, nga mopalabang dayon og resolusyon sa pagpamalit sa ubang ekipo sa SWAT sama sa motorsiklo ug assault rifle.
Dugang sa mayor nga giawhag niya ang kapolisan sa siyudad nga kanunay nga mag-aktibo sa pagmintinar sa kahusay ug kalinaw. - /GMR) (BANAT NEWS)
- Latest
