Engineer gilabnihan P50 mil

CEBU, Philippines- Naka-jackpot ang duha ka snatchers kay P50 mil ang sulod sa bag nga ilang gilabni sa may Pleasant Homes Subdivision, Punta Princesa, dakbayan sa Sugbo sa niaging adlaw.

Ang biktima nailhan nga si Engr. Glazier Labajo, 37, ug nagpuyo sa maong lugar.

Matud sa biktima nga samtang siya naglakaw gikan migawas sa ilang panimalay, usa ka pula nga motorsiklo nga adunay sakay nga duha ka lalaki ang kalit lang mihunong sa iyang tupad ug dayon bunlot sa dala niyang bag.

Nadala gyud sa mga snatchers ang iyang bag nga dunay sulod nga mga personal nga gamit, ATM card, mga ID’ cards ug kwarta sa nahisgutang kantidad. Sumala pa ni PO2 Erwin Usares sa Punta Princesa Police Station nga nahinabi sa Banat News nga ang kwarta para bayad unta sa sakyanan nga bag-o pa lang gikuha sa biktima. Ang kapolisan daling mihimo og pag-follow-up diin duna na sila’y lead sa posibleng mihimo sa krimen.  - /GMR) (BANAT NEWS)