Benepisyo sa DAP giyagyag ni Aquino

CEBU, Philippines- Wa gyud kapugngi sa mga kaalyado si Presidente Benigno Aquino III nga dili hisgutan ang giinitan karon sa iyang mga kritiko nga Disbursement Acceleration Program (DAP) atol sa iyang ikalimang State of the Nation Address (SONA) kagahapon diha sa Batasang Pambansa.

Mitambong ang 261 ka mga kongresista  gikan sa 290 ka mga distrito ug party-list representatives, lakip na si Kong. Lani Mercado, ang asawa sa gipriso karon tungod sa kasong plunder nga suspendidong si Senador Ramon Revilla Jr. Gipangulohan nila ni House Speaker Feliciano Belmonte ug Senate President Franklin Drilon ang pagpaminaw sa SONA ni Aquino.

Sa iyang speech, si Aquino miyagyag sa giingong mga benepisyo gikan sa DAP sa mga iskolar sa Technical Education and Skills Development Authority (TESDA). Matud pa ni Aquino nga pinaagi sa P1.6 bilyon nga DAP, 220,000 ka mga kabus nga kabataan ang nakaeskuyla. Ang 66 porsiyento sa TESDA graduates nakatrabaho na karon nga naglakip sa mga kababayen-an.

Kahinumdoman nga di pa lang dugay ang Korte Suprema mideklarar sa pipila ka bahin sa DAP nga unconstitutional ilabi na ang kabahin sa pagbalhin sa pundo gikan sa usa ngadto sa pikas nga proyekto o programa.

Samtang nahimong emosyonal si Aquino tungod kay bisan pa man sa iyang mga paningkamot duna gihapoy mga wala matagbaw sa iyang gipanghimo ug misaway pa kaniya inay nga motabang pagpangita og solusyon. Subli niyang gibalik ang gipanulti sa iyang amahan nga si kanhi senador Benigno Ninoy Aquino nga “The Filipinos is worth dying for” pinaagi sa pagdugang og “The Filipinos is worth living for ug The Filipinos is worth fighting for” isip presidente karon sa nasud.

Gibutyag usab ni Aquino ang mga proyekto sa imprastraktura sa iyang administrasyon nga milapas sa doble ang idaghanon itandi sa nakalabay’ng administrasyon apan menus ra ang nagastos tungod sa maayong pagdumala sa iyang administrasyon.

Gipadayag usab sa presidente ang kalampusan sa iyang kabinete sa pagbuhat sa tanan niining mahimo aron matabangan dayon ang mga nabiktima sa mga kalamidad bisan pa man sila mismong naghimo sa pagpangandam naapil sa maong kalamidad.

Sa Lanao del Sur, si Gov. Mamintal Adiong Jr. mipadayag nga magpabiling mosuporta ang mga opisyales ug lider sa ilang lalawigan kang Aquino tungod  kay si Aquino lang sa tanang mga presidente sa nasud ang mibubo og dakong pundo alang sa kalamboan sa ilang lugar. Sa kampanya sa kurapsyon, gibarahan ni Aquino ang mga rice hoarders ug smugglers. Matud pa usab ni Aquino nga usa sa gitutokan batok kurapsyon ang Bureau of Customs nga gigamitan gyud og “reset button” aron matangtang ang mga kawatan ug misaka ang koleksyon sa gobiyerno. Mibahad siya nga sa prisohan ang destinasyon sa mga kawatan sa gobiyerno.

Si Cebu City Mayor Michael Rama midayeg sa SONA ni Aquino tungod kay gihisgutan gyud niini ang kabahin sa Bus Rapid Transit (BRT) System nga alang sa mayor, senyales nga mahinayon na gyud kini nga proyekto dinhi sa siyudad. Gawas pa niini, gihisgutan usab ni Aquino ang pagsugod na sa pagpalambo sa Mactan Cebu International Airport. (BANAT NEWS)