Bala niuntol sa agtang
CEBU, Philippines- Nalandig sa tambalanan ang managsuon kinsa usa kanila kritikal ang kondisyon human gipamusil samtang nagkanta-kanta sa videokehan sa Guinsay, dakbayan sa Danao sa niaging adlaw.
Ang mga biktima naila nga sila si Hermio Calvo, 53, ug Aniceto Calvo, 44, taga Tuburan Sur sa maong dakbayan.
Matud ni PO2 Ronald Gomez sa Danao Police Station nga nahinabi sa Banat News nga kalit lang usa ka tawo ang miduol sa magsuon dayon pusil sa makadaghan nga higayon.
Daling gidala sa Danao District Hospital ang duha ka biktima human sa pagpamusil samtang nakasibat ang gunman sa wala masayri nga direksyon.
Igo sa dughan ang naangkon ni Hermio nga kritikal ang kahimtang samtang giingong wala makadulot sa agtang ni Anecito ang bala sa armas nga gigamit sa pagpamusil.
“Swerte pa gyud siya kay wala man gyud midulot ang bala sa iyang agtang, igo ra man pud milakra sir,” matud ni Gomez.
Matud ni Gomez nga posibleng dunay gitipigan nga pangdepensa sa lawas ang biktima o kaha anting-anting.
Posible usab nga paltik ang gigamit sa pagpamusil diin hinay na nga mogawas ang bala sa sumbohan kung sagunson ang pagpabuto.
Wala’y nakuha nga kabhang sa bala ang kapolisan sa crime scene.
Ang mga biktima miklaro nga wala sila’y atraso labi pa nga wala sila mokanta og “My Way” nga sagad kasuyaan sa mga videokehan. - /GMR) (BANAT NEWS)
- Latest