6-anyos naigo og saag nga bala
CEBU, Philippines - Dali nga gidala sa tambalanan ang usa ka 6-anyos nga bata’ng lalaki human naigo sa saag nga bala sulod sa ilang panimalay sa sitio Latid, Poblacion, lungsod sa Pinamungajan niadtong Sabado sa gabii.
Sumala pa ni PO1 Randy Caño sa Pinamungajan Police Station nga nabinabi sa Banat News nga ang bata naila nga si Jonhry Mundo nga nagpuyo ra maong lugar.
Sa imbestigasyon sa kapolisan nasayran nga samtang nanihapon ang pamilya, usa ka buto sa armas ang nadungog nila gikan sa gawas sa ilang panimalay ug kalit lang mihilak ang bata.
Ang amahan nga si Robert nagtoong gi-away sa igsoon ang bata apan sa iyang pagtan-aw naligo na kini sa dugo.
Igo sa abaga ang naangkon sa bata nga milapos sa pikas nga bahin hinungdang dali nga gidala sa Pinamungajan District Hospital. Sa gihimong pagsubay sa kapolisan ilang nakita ang usa ka lungag sa kilid sa bongbong nga plywood sa balay nga gituohan nga didto miagi ang bala.
Matud ni Caño nga bisan giunsa nila og pangutana ang mga tawo nga nagpuyo duol sa balay sa biktima apan wala’y bisan usa nga mitug-an nga nakakita sa pagpabuto og pusil.
Hinuon luwas na sa peligrong kahimtang ang bata samtang padayon ang imbestigasyon sa kapolisan. (BANAT NEWS)
- Latest
