Motorsiklo nasampak sa trak usa patay

CEBU, Philippines -  Maayong pagkabuak sa ulo ug naputol ang tiil sa usa ka 39-anyos nga lalaki human mabangga sa trak ang gimaneho niini nga motorsiklo sa  Barangay Ilihan sa dakbayan sa Toledo sa nakalabay’ng adlaw.

Ang biktima giila nga si Gerry Cañete taga San Carlos City Negros Occidental, sa gipahigayong imbestigasyon ni PO2 Celso Makidato investigator sa Toledo City Traffic Section nga paingon nang mopauli sa San Carlos City ang biktima sakay sa motorsiklo nga kusog nagpadagan.

Giingong milapas kini sa iyang lane ug nasampak sa gikasugat nga trak nga gimaneho ni Jonas Labador ,43. Ang trak gikan sa Cebu City padung sa Toledo nianang tungora. Daling  gidala sa Toledo City Hospital apan patay na kini. (Raymond Abarcas /EIM)

Sona ni PNoy  sugaton og rally

Kung si Presidente Benigno Aquino III mopahigayon sa iyang ika-limang State of the Nation Address (SONA) karong adlawa, andam na usab ang nagkalain-laing labor groups sa Sugbo sa pagpahigayon nila og anti-SONA rally karong adlawa.

Matud ni Jose Tomongha, chairman sa Alliance of Progressive Labor nga ang presidente daghang gisaad ngadto sa mga mamumuo matag pahigayon niini sa iyang SONA apan wala’y natuman niini. Si Tomongha nagkanayon nga nanawagan usab sila sa pagluwat sa katungdanan sa budget secretary nga si Butch Abad ug sa administrasyong Aquino sa pagpahigayon og “proper accounting” sa Citizen’s Audit sa Disbursement Acceleration Program. Si Dennis Derige, tigpamaba sa Partido ng Manggagawa-Cebu mihulagway nga ang ika-limang SONA ni Aquino wala’y natul-id sa patakaran ilabi na alang sa mga mamumuo ug wala’y nakahaw-as sa kalisud. Sa laing bahin, ang progressive youth organization, Anakbayan mikondena sa gobiyernong Aquino sa plano niini sa pagpakgang sa “SONA ng Bayan” protest diin sobra sa 10,000 ka polis ug 400 ka sundalo ang ipakatap sa lugar diin ipahigayon ang SONA.  (BANAT NEWS)