Grade IV naghikog

CEBU, Philippines - Patay  ang  Grade 1V nga tinun-an nga  gituohang naghikog pinaagi sa paghigot og pisi sa liog nga gihigot sa ang-ang sa hagdanan sa panimalay sa iyang  apohan sa Sitio Tawagan, Barangay Tayud, Lungsod sa Consolacion alas 6 pasado ang takna sa Biyernes sa gabii.

Si SPO3 Renerio Patillas sa Consolacion Police Station miila sa namatay nga mao si Lawrence Maquilan,  14 anyos nga giingong tulo na ka tuig nga nagpuyo sa iyang apohan human nagbulag ang iyang mga ginikanan.

Matud pa ni SPO3 Patillas nga ang uyoan sa bata nga si Johane Maquilan maoy unang nakakita ug dali nga mitangtang sa pisi  ug gidala kini sa Mendero Medical Clinic Center apan si Dr. Jeram Cabatingan nga nag-atiman mideklarar usab niini nga dead on arrival.

Samtang  laing kaso sa paghikog nahitabo usab sa Sitio Angasil, Barangay Mactan, Dakbayan sa Lapu-Lapu  niadtong Huwebes sa gabii diin usa ka Danny Silawan, 34, ang naghunos sa iyang kinabuhi.

Si PO2 Joseph Cotanda sa Homicide Section sa kapolisan sa Lapu-Lapu City Police Office (LLCPO) miingon nga nakurat ang pamilya ni  Arcadio Tiyok nga nagtan-aw og telebisyon dihang tungatunga sa pagbunok sa uwan misulod si Silawan ug mikuha sa gunting ibabaw sa ilang lamesa ug nadunggab sa iyang kaugalingon hinungdan sa ilang pagpanggawas.

Sa pagsusi nila balik sa sud, nagbuy-od na kini ug wala nay kinabuhi, wa pa matino sa kapolisan kung unsay rason sa paghikog ni Silawan. - /EIM) (BANAT NEWS)