P80 mil sa langyaw gisibat sa babaye
CEBU, Philippines - Nahanaw ang P80 mil nga salapi sa usa ka langyaw nga gituohan sa kapolisan nga gisakiyo sa gikadulog nga babaye sa usa ka lawak sa panimalay nga ilang gipuy-an sa Canjulao, dakbayan sa Lapu-Lapu niadtong Biyernes sa gabii.
Si SPO1 Romualdo Aniana sa Theft and Robbery Section(TRS) sa Lapu-Lapu City Police Office (LLCPO) miila sa biktima nga si Michael Robitt Harn, 66-anyos, taga nasud sa Australia ug ang suspetsado mao si Rubina Apilla Juaner, 23- anyos, taga General Santos City.
Asoy sa biktima nga gikaila niya ang maong babaye pinaagi sa pagpakig-chat sa internet ug misugat pa kini kaniya sa Mactan Cebu International Airport sa iyang paghidangat niadtong miaging Huwebes sa hapon.
Miabang ang langyaw sa usa ka apartment diin giingong may higala ang babaye sa maong dapit.
Matud sa langyaw nga nagsabot pa unta sila sa babaye nga mobakasyon sa Singapore.
Gumikan sa kakapoy sa iyang biyahe, daling nahinanok sa pagkatulog sa kama ang langyaw ug gikadulog pa niini ang babaye.
Alas 4 pasado sa kadlawon nakamata ang langyaw ug daku na lang ang iyang kahingangha kay nahanaw na ang babaye nga iyang gikadulog. Dihang gisusi sa biktima ang dala niining mga butang maoy nasuta nga naabli na ang iyang bag ug nahanaw na ang nahisgutang kantidad nga gisulod sa bag.
Si Aniana miingon nga nasayran na lang sa langyaw sa text message nga gipadala sa maong babaye nga milarga na kini paingon sa Davao. Gisuwayan pa unta pag-apas sa airport ang babaye apan wala na igkita. -/GMR) (BANAT NEWS)
- Latest