Hugawan dili hatagan og permit

CEBU, Philippines - Gitinguha sa kagamhanan sa dakbayan sa Mandaue nga malakip na sa mga rekisito sa mga patigayon ang tukmang paghipos sa basura sa pagkuha og business permit ug renewal matag tuig.

Kini ang nasayran sa Banat News kang Engr. Ricardo Tata Mendoza, solid waste management officer, sa kagamhanan sa dakbayan.

Matud niya nga gihimo nila karon ang pagsuhid sa mga patigayon sa 27 ka barangay sa dakbayan alang sa pag-ila ug ang pagpatawag sa mga nagdumala alang sa pagahimoon nilang seminar labot sa maong programa. Si Mendoza miingon nga ang tagdumala sa matag patigayon ang higpit usab nga mopatuman ngadto sa ilang mga kawani nga dili magpataka sa paglabay sa ilang mga basura.

Dugang ni Mendoza nga kun mahingpit na ang paglakip sa mga rekisito, maoy ilang himoon ang pagbutang og mga tawo nga mosuroy aron motan-aw sa mga malapason.

Kun adunay madakpan nga mga kawani nga nagpasagad lang sa paglabay sa basura malakip na sa mga matala nga kalapasan nga nahimo sa panahon sa tinuig nga pag-renew sa business permit nga makaingon sa kalangan. Gipasabot ni Mendoza nga sa maong paagi ang mga nagdumala ug mga tag-iya sa patigayon mohigpit gyud sa pagpahimangno sa ilang mga kawani aron dili makaangin sa ilang negosyo.

Hinuon mahingpit ang pagpatuman sa maong lagda sa higayon mapalabang na ang ordinansa alang niini.  (BANAT NEWS)