Mapping sa naigo sa Yolanda humana

CEBU, Philippines - Nahuman na sa Department of Environment and Natural Resources-7 ang gihimong geo-hazard mapping assessment sa walo ka lungsod ug usa ka siyudad nga giagian sa bagyong Yolanda sa amihanang bahin sa lalawigan sa Sugbo.

Matud sa tigpamaba sa DENR-7, Eddie Llamedo, nga 280 ka barangay ang ilang nakompleto sa gihimong assessment kun ang maong mga lugar dali ra nga bahaan ug delikado sa landslide.

Gidugang ni Llamedo nga niadtong miaging semana ilang gihatag ang resulta sa ilang gihimong assessment ngadto sa mga barangay kapitan kinsa giawhag nga kinahanglan tan-awon ang geo-hazard mapping alang sa disaster risk reduction. Nasuta nga mipahigayon sila og information, education ug communication campaign sa mga barangay dungan sa paghatag sa  ilang geo-hazard threat advisories.

Gawas sa geo-hazard mapping gitutukan usab sa DENR-7 ang beach forest ug mangrove plantations diin nakapagawas na og P3.5 milyones ang ilang ahensiya alang sa maong programa.

Nangayo usab og laing pundo ang DENR-7 balor sa P35 milyones ug gitagana gihapon sa mga katalagman nga nasinati sa Central Visayas sama sa 7.2 magnitude nga linog ug bagyong Yolanda.  (BANAT NEWS)