PO1 M.W. Roa pasalamatan

CEBU, Philippines - Litrato sa polis nga nag-trending sa Facebook tungod sa simple niyang pagtabang sa usa ka 75-anyos nga lalaki gi-share na og dul-an otso mil ug singkwenta mil usab ang mi-like diha sa maong social networking site.

Sa pagsuwat niini nga balita miabot na sa 1,678 ang mi-share sa maong hulagway ug 222 ka mga likes gikan sa tag- iya sa Facebook account nga nag-post niini nga si Orlando Enoveso, ang tawong natabangan ni Roa pag-ilis sa na-flat niyang ligid niadtong Hulyo 15. Apan sa PNP Facebook duna nay kapin sa 48,000 ka likes ug 7,000 shares ang hulagway ni PO1 Roa.

Gikatakda nga personal nga pasalamatan sa Cebu City Police Office si Police Office One Mark Wilson Roa, ang polis nga nag-trending karon sa Facebook human gi-post ang iyang hulagway sa tawong iyang natabangan.

Si Senior Superintendent Noli Romana, director sa CCPO mibutyag nga maayong ehemplo ang gihimo ni PO1 Roa bisan sa iyang pagka “rookie” nga polis. Sumala pa ni Romana nga karong adlaw nga Lunes plano niini nga human sa flag raising ceremony, tagaan og pagpasalamat si Roa.

Gidugang sa opisyal nga himuong sumbanan sa tanang mga polis ang gibuhat ni Roa nga kinahanglang dili magpanuko og tabang niadtong mga tawong nanginahanglan.

Unang migawas ang maong balita dinhi sa Banat News human nag-trending ang hulagway ni Roa sa Facebook, si Roa mibutyag sa Banat News nga wala gayod siya magtoo nga ingon ani ba diay ang mahimong  padulngan sa iyang gihimo nga simpleng pagtabang. (BANAT NEWS)