Mga drug suspects sa Metro Cebu gipanakop

CEBU, Philippines - Nadakpan sa City Anti-Illegal Drug Special Operation (CAIDSOTG) sa Cebu City Police Office ang tulo ka mga lalaki sa duha ka buy-bust operation nga gipahigayon pasado alas 9 sa gabii sa Barangay Duljo-Fatima, ug Kamagayan sa dakbayan sa Sugbo.

Ang mga nadakpan naila nga sila si Jhonil Anotado, 23, ug Mario Tugbong pulos nagpuyo sa Huyong-Huyong, Alaska Mambaling.

Matud ni Senior Inspector Eunil Avergonzado, hepe sa City Anti-Illegal Drug Special Operation (CAIDSOTG) nasakmit gikan sa  duha ang siyam ka gagmay nga pakete ug duha ka medium-size sa gituohang shabu, marked money nga P100 ug P960 nga gituohang halin sa illegal drugs. Daling mibiya sa maong lugar ang mga polis sa kahadlok nga tabangan sila sa mga paryente ug silingan sa duha.

Samtang nadakpan usab sa mao gihapong grupo si Neil Manila, 38, diha sa Kamagayan ug nakuhaan og lima ka kahon nga dunay tag 100 sa Nubain ampoules, dugang walo ka ampoules, P150 buy-bust money, cash money nga P550 nga gituhoang halin sa dinakpan.

Talisay City

Samtang sa Sitio Mahayahay, Barangay San Isidro, dakbayan sa Talisay, nadakpan usab sa buy-bust operation ang usa ka Roy Cabo, 24,  kinsa nakuhaan og 12 ka paketeng shabu ug laing usa ka gamay nga rectangular nga paketeng shabu, P200 nga buy-bust money ug P600 nga kwarta nga gituohang halin sa ginadiling drugas.

Mandaue City

Laing nadakpan sa Presinto  4 ug Presinto 5 sa Mandaue City Police Office (MCPO) ang duha ka gikatahapang pushers sa managlahing operasyon pinasikad sa search warrants nga miresulta sa pagkasakmit sa mga shabu, armas ug drug paraphernalia.

Si Inspector Rey delos Santos, deputy chief sa Presinto 4 armado og search warrant gikan ni Judge Teresita Abarquez Galanida sa miaging Miyerkules sa kaadlawon batok ni Dennis Salvador, 22,  taga Sitio Pilit, Barangay Cabancalan sa maong dakbayan.

Tulo ka dagko nga pakete nga shabu, usa ka gamay nga pakete ug laing tulo ka plastic wa nay sud nga pakete ang nasakmit kaniya.

Ang laing nadakpan sa Presinto 5 mao si Regiel  Tuñacao Jr., 21, taga Sitio Pilapil, Barangay Umapad  ug nakuhaan og duha ka medium pack ug unom ka gagmay nga pakete sa shabu ug drug paraphernalia. Ang pagpangronda gihimo pinaagi sa search warrant sa mao gihapong hukmanan.

Coastal Barangays

Sa laing bahin, ang hepe sa Cebu City Police Office (CCPO) Senior Superintendent Noli Romana mimando nga ipa-monitor ang coastal barangays sa dakbayan tungod sa report nga anha ipalusot ang mga illegal drugs.

Matud pa nga base sa nakuha nilang impormasyon tulo ka buwan nang diha ipalusot sa coastal area ang mga drugas.

Toledo City

Samtang sa dakbayan sa Toledo, si Chief Inspector Michael Bastes, hepe sa kapolisan sa maong dakbayan mopahigayon og drug symposium sa mga public schools.

Matud ni Bastes nga angayang masayod ang mga kabataan kun unsay kadaot ang epekto sa ilegal nga drugas.Jojo Ugdol, Brenda Batuto, Romeo Limpangog, Raymond Abarcas ug Jasmin Anais Lanillo (BANAT NEWS)