Nahulog sa suba patay

CEBU, Philippines - Patay na nga napalgan ang usa ka mag-uuma nga nahulog sa suba dihang nidagan sa kahadlok nga nagdala og bunal nga kahoy ang iyang nakabikil nga silingan atol sa ilang pagtagay.

Nailhan ang biktima nga si Danilo Briones, 36, minyo nga taga sitio Liki, Tabunok, lungsod sa Tabuelan.

Matud ni PO1 Regie Pescante sa Tabuelan Police Station nga nahinabi sa Banat News nga nagkatinubagay ang biktima ug iyang silingan nga si Rodelio Ramos atol sa ilang pagtagay.

Sa kasuko ni Ramos mikuha kini og kahoy apan nakabantay si Briones kinsa daling midagan ug wala nabantayi ang lawom nga pangpang diin siya nahulog padulong sa suba.

Ang mga kauban sa pagtagay misulti ngadto sa kapolisan nga wala nila hilabti si Briones ug kalit lang kining midagan human nakita ang dala nga kahoy ni Ramos. Apan ang pamilya sa biktima dili kombinsido sa pamahayag sa ilang mga silingan gumikan kay may samad ug bun-og nga nakita sa patay’ng lawas ni Briones.

Matud ni Pescante nga posibleng ang pagkabunal niini sa mga bato sa suba ang hinungdan sa iyang mga bun-og samtang ang pagkalumos ang nakita sa doktor nga hinungdan sa pagkamatay ni Briones. Sutaon pa sa kapolisan kung may tulubagon ba si Ramos sa kamatayon ni Briones.  - /GMR) (BANAT NEWS)