2 ka balay nasunog, P300T danyos
CEBU, Philippines - Mokabat sa P300,000 ang gibiling danyos sa nasunog nga duha ka panimalay sa sitio Superior, Looc, dakbayan sa Mandaue kagahapon sa hapon.
Gialarma sa Bureau of Fire Protection (BFP) ala 1:10 ang pagkasunog sa panimalay nilang Danilo Signe ug Irene Codoy ug nakontrolar sulod sa 30 minutos.
Matud ni SFO1 Julius Lloa nga nagsugod sa sulod sa lawak sa panimalay ni Codoy nga ilang gituohang electrical short circuit ang hinungdan niini.
Si Lloa miingon nga bisan kun gilibotan og firewall ang duha ka balay nga nasunog apan ila gihapon gipaubos sa Task Force Alpha.Wala hinuon maglisod ang kabomberohan sa pagpugong sa kayo.
Si Roger Paller, Public Information Officer sa dakbayan sa Mandaue, miingon nga bisan kun duha lang ka pamilya ang naapektohan sa maong sunog ila gihapon gipahimutang ang tulda sa tapad sa maong lugar nga mahimong temporaryong kapuy-an sa mga biktima.
Ang City Social Welfare and Development Office mopadala usab og pagkaon ngadto sa duha ka pamilya nga molungtad og tulo ka adlaw. -/GMR) (BANAT NEWS)
- Latest
