Wala’y kasiguroan

CEBU, Philippines - Dili makapaniguro ang kadagkoan sa LTO ug LTFRB nga ang gisugyot sa mga operators og public utility vehicles (PUV) nga kausaban sa Joint Administrative Order 2014-01 aprobahan sa kadagkoan sa Department of Transportation and Communications.

Sila si LTFRB-7 Regional Director Ahmed Cuizon ug LTO-7 Regional Director Arnel Tancinco naminaw sa sentimento sa mga drayber ug operators dinhi sa Sugbo ug gipadala nila kini ngadto sa DOTC aron kahimoan og pagtuon kun angay ba nga hatagan og katumanan.

Ang mga operators mireklamo kun ngano nga iapil man sila sa pagsilot kun ang ilang mga drayber madakpan nga wala mohatod og pasahero base sa ilang rota nga wala man kini nila sugoa.

Si Romeo Armamento, bise presidente sa National Confederation on Transportworkers Union (NCTU) for the Visayas, mihulagway nga dili gayud makiangayon kanila’ng mga operator og mga PUV nga pasaheroan nga malakip kini sa pagpahamtang og silot sa mga drayber nga madakpan.

Gipasabot ni Armamento nga kun ang drayber nga madakpan nga silotan sa pagpabayad og multa nga P5,000   susama usab nga silot ang madawat sa operator sa unit nga iyang gimaneho.

Dugang pa ni Armamento nga kun ang lain nilang drayber madakpan na usab nga nagmaneho sa laing unit nga malakip gihapon ang operator mahimo na kini nga ikaduha’ng kalapasan sa operator ug madoble na ang ilang multa.

Dugang ni Armamento nga kun mag-ilis sila og drayber apan madakpan gihapon kini sa salaod nga ang operator apil sa silot, mahimo na kini nga ikatulo nilang kalapasan sa operator ug mahimong marebokar na ang ilang prangkisa.

Gipasabot ni Armamento nga may mga bahin sa JAO 2014-01 nga dili nila isugyot ang pag-usab sama sa pagpahamtang og P1 milyon nga multa sa mag-operate og kolorum.

Si Armamento miingon nga uyon kaayo sila pagpahamtang og dagkong multa sa operator og kolorum nga sakyanan tungod kay sa pagsumpo niini sa kagamhanan dako man kini og ikatabang ngadto kanila kay modako man ang  kita sa ilang mga drayber. (BANAT NEWS)