Operasyon batok marijuana hugtan

CEBU, Philippines- Hugtan sa kapolisan ang ilang operasyon sa pagsubay sa gipangtanum nga marijuana sa kabukiran sa lungsod sa Balamban.

Kini human natumbok na nga upat ka barangay sa lungsod ang adunay gipangtanum nga marijuana ug maoy tinubdan sa kinilo’ng marijuana nga nasakmit sa kapolisan sa dakbayan sa Sugbo sa pipila ka operasyon nga ilang gilusad.

Ang  mga barangay mao ang Bayong, Matun-og, Sunog ug Ga-as.

Matud ni Chief Insp. Richard Oliver sa Balamban Police Station nga nahinabi sa Banat News nga usa sa ilang plano karon mao ang pagpahugot pa sa operasyon ug pagpangita sa mga gipangtanom nga drugas aron ilang masakmit.

Base sa impormasyon sa kapolisan nasayran nga ang barangay Ga-as maoy gihimong drop-off point sa mga marijuana nga nagagikan sa silingan nga barangay gumikan kay ang maong barangay duol lang sa highway ug sayon alang sa pagkuha sa drugas.

Sumala pa ni Oliver nga duna na’y mga livelihood projects ang gihatag sa lokal nga kagamhanan sa katawhan sa maong lugar apan dili gihapon moundang sa pagtanum og marijuana ang mga residente gumikan kay mas dali ang kwarta sa maong negosyo.

Nagtinguha usab ang kapolisan nga magbutang og detachment sa barangay Ga-as aron pagpakgang sa ilegal nga negosyo sa mga tawo sa maong lugar apan usa sa problema mao ang kakuwang sa mga       sakop.

Matud ni Oliver nga moabot lang sa 20 kapin ang iyang mga aktibong sakop ug sa kadaku sa ilang lugar nga bantayan, maglisud sila sa ilang trabaho.

Si Oliver nanghinaut nga madugangan ang iyang mga sakop aron mas mapalig-on pa nila ang kampanya batok ilegal nga drugas.

Hinoon gipasalig sa opisyal nga buhaton sa kapolisan sa Balamban ang pagsulbad sa kalihukan sa drugas sa maong lugar aron pagpapas sa bati nga imahen sa lungsod nga naila nga gigikanan sa marijuana. - /GMR) (BANAT NEWS)