Polis nga positive sa drugs giimbestigahan na
CEBU, Philippines- Ang polis kinsa nagpositibo sa drugas sa gipahigayon nga surprise drug test adtong Biyernes gipailawom na sa pre-charged evaluation sa Provincial Investigation and Detective Management Branch.
Si Cebu Provincial Police Office Director, Sr. Supt. Noel Gillamac mitug-an nga nagpaabot pa sila sa confirmatory result gikan sa Philippine National Police Crime Laboratory-7 samtang hatagan og higayon ang maong polis sa pag-contest sa resulta.
Sa pagkakaron ang maong polis anaa gihapon sa police station kung diin kini madestino.
Si Gillamac mitug-an nga wala silay nadawat nga impormasyon nga tiggamitan kini og drugas.
Sa 48 ka mga polis nga gikan sa nagkadaiyang police stations, usa lang nagpositibo sa drugas sa gipahigayon nga surprise drug test sa Provincial Intelligence Branch sa provincial headquarters.
Ang PIB mihimo og Police Intelligence Seminar uban ang Regional Intelligence Branch sa dihang gihimo ang drug test matud ni Supt. Rodulfo Albotra Jr., PIB chief.
Tug-an ni Albotra nga ang maong random ug surprise drug test sa kapulisan sa probinsiya nagpakita nga ilang gilimpyohan ang ilang kaugalingong tugkaran sa dili pa ang uban aron mabalik ang pagsalig sa katawhan ngadto kanila. - /EIM) (BANAT NEWS)
- Latest
