Inter-agency committee sa NFA giumol

CEBU, Philippines - Giumol sa National Food Authority-7 ang usa ka Inter-Agency Committee on Rice aron mosusi ug motan-aw sa "stability of supply and quality" sa mga commercial rice apil na ang NFA rice sa kamerkaduhan sa rehiyon.

Si DTI-7 Consumer Welfare and Business Regulatory Division (CWBRD) chief ug provincial director sa Sugbo, Zaide Bation, miingon nga nahingpit ang pag-umol sa grupo atol sa tigum nga nagtuki sa sitwasyon sa presyo sa bugas sa Central Visayas ilabi na sa Sugbo.

Matud ni Bation nga ang naasoy’ng komitiba gilangkuban sa DTI-Cebu, PNP-Criminal Investigation and Detection Group-7 ug National Bureau of Investigation-7.

Nagkanayun si Bation nga ang ilang buhatan mohatag og kasegurohan nga ang naasoy nga grupo kanunay’ng aktibo sa ilang tahas ilabina sa pagpahigayun og regular monitoring sa presyo sa bugas sa kamerkaduhan ug labaw sa tanan ang hoarding activities sa mga rice traders nga mapahimuslanon sa kahigayunan.

“We already have schedules in checking warehouses to check on possible hoarding,” matud ni Bation atol sa Association of Government Information Officers (AGIO-7) Forum sa niaging adlawa.  (BANAT NEWS)