Mga tinun-an sa Talisay City College nag-rally
CEBU, Philippines - Kapin sa 200 ka estudyante sa Talisay City College (TCC) uban sa ilang mga ginikanan nagpahigayon og rally atubangan sa City Hall kagahapon sa buntag tungod sa ilang yangu-ngo batok kang Department of Education (DepEd) Division Superintendent Woodrow Denuyo.
Ang mga nag-rally nagdala og rosaryohan ug placards nga nagtapok atubangan sa City Hall.
Si Ric Rian Bautista, fourth year college student sa kursong Bachelor of Secondary Education (BSED) nagkanayon nga mihangyo lang sila sa approval ni Denuyo nga i-assign sila ngadto sa mga tunghaan sa siyudad aron makapahigayon sila sa ilang internship o practice teaching.
Ang internship pre-requisite kini sa mga graduating students nga mikuha sa kursong Bachelor of Elementary Education (BEED) ug BSED.
Matud ni Bautista nga ang ilang internship magsugod unta niadtong milabay’ng buwan sa Hunyo apan hangtod karon padayon pa gihapon sila’ng naghuwat sa approval ni Denuyo aron ma-accommodate sila sa mga prinsipal sa matag eskwelahan. Matud usab ni Bautista nga si Denuyo mipasabot kanila nga dili kini mohatag og approval tungod kay ang officer-in-charge (OIC) sa TCC nga si Dr. Ester Velasquez wala pa mo-report sa tunghaan.
Apan ang mga estudyante miinsister nga bisan og wala si Dr. Velasquez, si Denuyo angay’ng morespeto sa pirma ni Mayor Johnny De los Reyes. Si Nancy Jadulco, professor of education sa TCC, nagkanayon nga mipahibalo na sila sa tanang prinsipal nga mag-convene uban kang Mayor De los Reyes aron maresolba ang maong problema.
Sa maong rally, usa ka estudyante nga si Christine Zapanta nga taga Barangay Lawaan II ang mi-collapse. Usa sa mga inahan sa mga estudyante nga si Elena Halipa nagkanayon nga misalmot sila sa nahisgutang rally tungod kay ang tumong niini dili lang alang sa ilang mga anak apan alang usab kanila.
Matud ni Halipa nabatyagan usab nila ang kahasol ug kabalaka nga gibati sa mga estudyante. Si De los Reyes sa iyang bahin, nagkanayon nga mipirma na siya sa approval bisan og wala pa motungha sa iyang buhatan diha sa TCC si Dr. Velasquez. (BANAT NEWS)
- Latest
