Lee ug Cornejo gipangita dinhi
CEBU, Philippines - Negosyanteng Cedric Lee ug kauban niining akusadong si Deniece Cornejo posibleng nia dinhi sa Sugbo nagtago tungod sa kadaghan sa ilang mga higala dinhi.
Sila si Lee ug Cornejo nalutsan og warrant of arrest sa kasong serious illegal detention nga gipasaka batok kanila sa TV host /comedian nga si Vhong Navarro ug walay pyansa nga girekomendar alang kanila. Sumala pa ni Superintendent Pablo Labra, hepe sa Regional Intelligence Division sa Police Regional Office-7, gipangita na nila ang duha tungod kay daghang mga kailang prominenteng tawo si Lee dinhi sa Sugbo.
Hangtud karon, gipangita pa gihapon ang duha didto sa kaulohan apan pakyas ang mga awtoridad.
Si Labra nagkanayon nga aduna sila karo’y gipanid-ang lugar ug mga personahe nga posibleng motabang nila ni Lee ug Cornejo.
“Tanan nga mga kaila ni Lee atong gi-trace karon, kay daku ang posibilidad nga nia sila dinhi,†nagkanayon si Labra.
Bisan ang National Bureau of Investigation-7 mipahibalo nga hasta sila mihimo usab sila og operasyon pagpangita sa duha dinhi sa lalawigan.
Nasayran nga ang negosyanteng si Lee ang mitanyag kini kaniadto sa Kapitolyo nga maoy modumala sa tukoron nga waste to energy facility sa kontrobersiyal nga Balili estate property sa Tinaan, Naga City.
Ang maong proyekto nahuna-hunaan nga buhaton ni kanhi gobernador ug karon Kongresista Gwendolyn Garcia nga drydock sa mga barko, apan wala napadayon gumikan sa giingong mga anomaliya ug pagpasaka og kaso batok sa mga nalambigit sa maong proyekto. (BANAT NEWS)
- Latest
