Talisay budget officer dili mahadlok imbestigahon

CEBU, Philippines - Si Talisay City Budget Officer Edgar Mabunay andam nga moatubang og imbestigasyon kabahin sa isyu sa P300 mil nga premyo sa Talisay City  Central School sa pagdaog nila sa milabay’ng Sinulog sa Kabataan nga wala mahatag sa hingtungdang mga tinun-an.

Hangtud karon wala pa makahatag og husay si Mabunay kun hain na ang mao nga kwarta.

Si Talisay City Accountant Viluzminda Villarante mibutyag nga ang siyudad mipagawas og P1,542,200 gikan sa General Fund budget alang sa gastohan sa mga tinun-an pagsalmot nila sa Sinulog sa Kabataan ug ang Department of Education (DepEd) mihatag usab gani og P1,037,000 nga budget.

Gawas niini ang siyudad mihatag usab og laing P208 mil nga budget alang sa pagpahigayon og “repeat performance” sa midaog nga contingents.

Si Mabunay kaniadto miangkon nga gihuwaman usa niya ang P300 mil nga premyo sa mga tinun-an tungod kay nagkuwang ang budget nga gihatag sa kagamhanan sa siyudad.

Si Villarante nagkanayon nga ang premyo dili mosulod sa panudlanan sa siyudad tungod kay ang ngalan sa tseke dili man sa kagamhanan sa Talisay, kun dili sa tunghaan.

Matud ni Villarante nga ang siyudad dili na mopagawas pa og laing budget aron itapak sa kwarta nga gihuwaman ni Mabunay tungod kay nakagahin na og kantidad ang siyudad alang sa mao nga gastohan.

Apan si Mabunay miingon nga andam siya nga mopaubos sa imbestigasyon kabahin sa nahisgutang isyu.

“Willing ko nga ma-subject to investigation, I’m willing to face any investigation that will arise,” matud ni Mabunay kinsa mitug-an nga apektado ang iyang pamilya ug kabanay sa maong isyu.

Iyang gipasabot nga nagamit niya ang kwarta sa “other incidental expenses” ug duna siya’y mapakita niini nga mga dokumento apan wala na niya pangayoi og budget aron dili na mabug-atan sa gasto ang dakbayan.

Matud ni Mabunay nga ang choreographer nangayo usab og 20 porsiyento sa premyo. (BANAT NEWS)