Suspek pagpatay sa duha ka Koreano gikiha og carnapping

CEBU, Philippines - Duha ka tawo nga gitumbok nga responsable pagpatay sa duha ka Koreano nga gidauban sulod sa ilang sakyanan didto sa Danao gipasakaan na og kaso sa piskaliya.

Sila si Warren Sia, usa ka car dealer nga taga dakbayan sa Talisay ug ang iyang caretaker sa shop nga si Andriana Ardiente gipasakaan lang usa og kaso nga carnapping didto Cebu Provincial Prosecutor’s Office kaniadtong miaging semana. Si Sr. Insp. Ramil Morpos, imbestigador sa Provincial Investigation and Detective Management Branch, mipasabot nga giuna nila pagpasaka ang carnapping kay gilig-on pa nila ang ebidensya alang sa kaso nga murder nga isunod nila pagpasaka batok sa sama nga suspetsado.

Matud ni Morpos nga si Sia nalambigit sa kaso nga carnapping tungod sa pamahayag sa duha ka witnesses ug base usab sa ubang ebidensiya nga nakuha sa kapulisan. Ang mga biktima nakit-ang patay na sulod sa nasunog nga sakyanan. Ang kapolisan nagduda nga upat ngadto sa lima ka tawo ang responsable.

“We are 70 to 80 percent na sa kaso,” matud ni Morpos kinsa midugang nga dili una nila mapasakaan og kaso’ng murder ang mga suspek kay kuwang pa ang ilang ebidensiya. Ang Special Investigation Task Group mi-search sa bodega nga gipanag-iya ni Sia sa Barangay Pakigne, Minglanilla ug nakuha nila ang sakyanan nga Mitsubishi Lancer nga gipanag-iya sa usa sa mga witness nga matud pa hinulaman sa mga biktima aron i-deal apan wala na mabalik. Ang witness mi-file na usab og motion to release vehicle ngadto kang RTC Judge Wilfredo Navarro pinaagi sa iyang abogado.

Nakuha usab sa kapolisan gikan sa bodega ang Kia Sorento nga walay mga dokumento.

Matud ni Morpos nga ang Hyundai Sta. Fe nga sakyanan nga didto makit-i ang duha ka patay’ng lawas sa Koreano gipalit sa usa sa mga witnesses apan wala pa mabalhin ang rehistro niini kay wala pa kini matud pa maimpas.  (BANAT NEWS)