Edaran nga lalaki gusto’ng motilaw unta og batan-on

CEBU, Philippines - Nagtingkagol karon sa bilanggoan sa Samboan Police Station ang usa ka 51-anyos nga ulitawong-guwang nga nagpailang pastor sa usa ka tinuohan human gipasanginlang misulay paglugos sa 18-anyos nga dalaga dihang naligo kini sulod sa banyo kaniadtong Martes sa gabii.

Ang dinakpan nga si Edilberto Anuos lumad nga taga Tungawan, Tambulig, Zamboanga Del Sur ug bag-ohay pa’ng nagpuyo sa maong lugar.

Matud pa nga nagpuyo sa kombento sa usa ka simbahan duol sa balay sa pamilya sa biktima ang suspek. Sumala pa ni PO2 Jovelyn Genio sa Womens Desk sa Samboan Police Station nga gikan nangaligo sa dagat ang pamilya sa biktima kuyog ang suspetsado human nagsaulog sila sa birthday sa amahan sa babaye.

Matud pa nga anha magkaligoan ang pamilya sa biktima sa banyo sa maong kombento kay sila man maoy mga caretaker.

Samtang namanlaw ang biktima sulod sa banyo kalit nga misulod ang suspek ug gidiretso siya og gakos hinungdan nga mikisi-kisi siya pag-ayo ug misiyagit pagpangayo og tabang.

Sa tantong pakigbisog sa dalaga nakalighot siya ug milayat sa bintana sa banyo ug nakapangayo og tabang hinungdan sa pagkasikop sa suspek.

Ang biktima nga giingong na-traumatized sa hitabo gidala sa Vicente Sotto Memorial Medical Center alang sa iyang eksaminasyon. (BANAT NEWS)