Kawata’g motorsiklo sa IT Park nadakpan
CEBU, Philippines - Usa ka gidudahang kawatan og motorsiklo ang nadakpan sa mga gwardiya sa Asia Town IT Park sa barangay Apas ning dakbayan sa Sugbo.
Giila ang suspek nga si Remegio Sotto Borbajo, 24, taga Sitio Busay, Paril, Cebu City. Nadakpan si Borbajo sa mga gwardiyang sila si Elyboy Monarca Sumalyo ug Gualberto Taghap dihang gisuwayan niini pagkawat ang usa ka Honda XRM nga gipanag-iya ni Jedu Caballero, 25, nga nagtrabaho sa maong dapit.
Matud pa nga dunay kauban ang suspek nga laing lalaking nagmotor apan pagkakita niining nadakpan si Borbajo mipasirit kini og padagan palayo ug wa na maabti sa mga gwardiya.
Pipila ka buwan na ang milabay dihang usa ka opisyal sa Philippine Air Force ang gikawatan og motorsiklo sa mao gihapong lugar nga nalakip sa nahanaw ang iyang mga importanteng papeles ug armas. (BANAT NEWS)
- Latest
