Wanted sulod sa 20 ka tuig nadakpan

CEBU, Philippines -  Taga Negros Oriental nga nahimong usa sa most wanted persons sa rehiyon IV nadakpan sa kapolisan kaniadtong Domingo.

Ang linangkob nga team sa Regional Criminal Investigation and Detection Unit (RCIDU)-7 ug RCIDU sa rehiyon-4  midakop ni Gerardo Tabarno didto sa Das Mariñas, probinsiya sa Cavite. Ang 43-anyos nga dinakpan lumad nga taga Sta. Catalina, Negros Oriental ug adunay P300 mil nga patong sa ulo.

Si Police Inspector Teofilo Juanata Jr., sa RCIDU-7 mibutyag nga ang suspetsado nag-atubang og kasong pagpatay ug sulod sa 20 ka tuig kining nagtago-tago.

Dala sa mga polis ang kopya sa warrant of arrest sa suspetsado nga giisyu sa Regional Trial Court (RTC) Branch 49 nga nagbase sa Puerto Princesa, Palawan.

Matud pa ni Juanata nga subay sa Memorandum Circular 2004-11 nga naabot sa ilang buhatan, nalatid nga most wanted person si Tabarno sa Region IV-B sa pagpatay sa kauban niining mananagat. (BANAT NEWS)