MERS CoVirus gi-monitor sa CV

CEBU, Philippines -  Ang Bureau of Quarantine  ug ang Department of Health lakip na ang mga local government units hugot karon nga nag-monitor kabahin sa sakit nga Middle East Respiratory Syndrome (MERS)-Corona Virus.

Ang BQ higpit nga naniid sa mga pasahero nga mangabot sa Mactan Cebu International Airport tungod sa MERS.

Si Dr. Bruce Ceniza, Quarantine Medical Officer miingon nga mipagawas og kamanduan ang DOH nga monitoron gyud ang body temperature sa tanang mga pasahero sa tugpahanan gamit ang ilang thermal scanner. “Thermal scanner gi-set namo sa 36.5 kung mosaka ni mo-alarm na siya mahibaw-an nato kung ang patient naay gipaminaw that’s the time nga i-double check nato diri,” sumala ni Ceniza.

Nasayran nga ang mga connecting flights gikan sa Middle East sama sa Singapore ug Hongkong maoy usa sa ilang gitutukan karon. Ang DOH-7 nakigpulong sa mga opisyales sa siyudad sa Mandaue ug ilang gipahibawo nga nagnegatibo sa Mers-Cov ang  usa sa mga pasahero nga anaa sa ilang siyudad.

Samtang si Lapu-Lapu City Mayor Paz Radaza sa iyang bahin miingon nga ang gitudlo sa DOH-7 kanila mao ang proper hygiene aron makalikay sa Mers-Cov.   (BANAT NEWS)