Mga ‘kawatan’ namiktima nadakpan

CEBU, Philippines - Duha ka lalaki nabiktima sa pagpangawat atol niadtong Biyernes Santo sa managlahing lugar sa dakbayan sa Talisay.

Unang insidente nahitabo sa Barangay Lawaan III diin usa ka balay nga gipanag-iya ni Domingo Pan, 47, nagpuyo sa Barangay Pit-os, dakbayan sa Sugbo gilungkab.

Ang mga suspetsado mao sila si Joselito Gonzales, 30, Ronald Canario, 26, ug Ricky Ongue, 27, parehong residente  sa Barangay Lawaan III. Ang tulo nasikop sa mga tanod sa barangay nga sila si Allan Echavez, Efren Cabuenas ug Demecillo Coronel.

Ang mga suspetsado gipasanginlang milungkab sa sliding window sa balay sa biktima ug mikuha sa installed electrical wire 5.5 mm THHN (1 box) nagkantidad og P5,500, 3.5 THHN wire  (1 box) nagkantidad og P3,500 ug 2.0 THHN wire nga wala mapiho ang kantidad ug electrical dryer.

Ang mga suspetsado nagtingkagol sa Talisay City detention cell. Sa laing bahin, usa ka 34-anyos nga lalaki ang nabiktima sa pagpangawat sulod sa Saint Joseph Parish sa Barangay Tabunok niadtong gabii sa Biyernes  Santo.

Ang biktimang si Rey Ygoña, residente sa Tabunok misumbong sa kapolisan nga niadtong higayona nagtambong siya og misa ug wala siya makabantay nga ang iyang ATNT-SQH877 nga cellular phone nga nagkantidad og P20,000 gikuot na kini sa wala mailhing kawatan.

Subay niini atol sa Huwebes ug Biyernes Santo walay mga dagkung alarma ang natala sa kapolisan sa dakbayan sa Talisay.

Nabantayan usab nga sa maong mga adlaw dunay mga police assistance desk ang gipangbutang diha sa may baba sa mga simbahan sa Talisay aron dunay polis nga makatabang sa mga mosulod sa simbahan.

Si Inspector Rogene Fodutan nga nahinabi sa Banat News kagahapon mibutyag nga padayon ang ilang pagpatrolya sa  kadalanan ug nangandam usab sila sa “Sugat” karong kaadlawon diin ang matag simbahan duna gihapon kini mga police detail. (Brenda D. Batuto  ug report nila ni Juffer Denn C. Bornales ug Lara Praz C. Mayol, CNU Interns/EIM) (BANAT NEWS)