Bargayo nagpalansang sa krus sa ika-20 higayon

CEBU, Philippines - Sa ika-20 ka higayon, subling nagpalansang si Gilbert Bargayo ug karon gihimo niya kini sa lungsod sa Tuburan niadtong Biyernes Santo nga gihugopan sa mga langyaw ug lokal nga turista lakip na sa usa ka langyaw nga tv host nga mipas-an sab sa krus.

Si Bargayo nga nahinabi sa mga tigbalita miingon nga nagpalansang siya tungod kay iya ning paagi sa pagpenitensya sa iyang mga sala ug lakip na sa iyang mga higala.

Si Will Davies, 60, usa ka adventurer, nga taga South Wales nga host sa usa ka documentary alang sa usa ka estasyon sa TV sa   Amerika usa sa mga langyaw nga mitambong sa maong pagpalansang ni Bargayo.

Si Davies mipas-an sab sa krus nga gipas-an ni Bargayo ug dihang nahinabi kini sa Banat News siya miingon nga gidapit siya ni Bargayo sa maong kalihokan.

Matud pa ni Davies nga dili lalim ang gihimo ni Bargayo ug dako kaayo siya’g respeto sa gibuhat niini.

Si Yuri Tsoy nga usa ka Russian photojournalist sa Chief Times miingon nga dihang nahibaw-an niya nga dunay magpalansang dali siyang miadto sa Tuburan ug miangkon siya nga mao kini ang labing unang higayon nga nakakita siya og susama niini. Tuyo lang unta niya pag-ari sa Pilipinas ang pagkuha og mga hulagway sa nasud. Si Mayor Aljun Diamante nga nahinabi sa Banat News miingon nga iyang personal nga gihangyo si Bargayo nga  anha magpalansang sa Tuburan. Plano sa mayor nga himoung tourist attraction ang maong kalihokan. Apan gihimakak niya nga nagpabayad si Bargayo.

Matud pa nga ang accommodation lang ni Bargayo ug  tabangan siya sa pagpabarog sa iyang kapilya sa Guadalupe, Carcar.  Apan sa wa pa malansang si Bargayo usa sa mga kauban niini nga nagdala sa papel ni Estas nga si Edwin Qualver ang nakuyapan samtang nagbitay sa krus tungod kay wa namahaw ug naniudto agi og sakripisyo.

Usa sab ka babaye nga mitan-aw ang gitabang sa mga tawo tungod kay nakuyapan sa kainit.

Human nga nalansang si Bargayo sobra sa 30 ka gutlo giibot ang lansang sa iyang kamot ug tiil. Daling gidala sa iyang sakyanan si Bargayo human sa iyang pagpalansang ug ang mga tawo nga nagtapok sa lugar dali sab nga nangawagtang.  (BANAT NEWS)