Bug-at nga silot sa mangubkob og bas

CEBU, Philippines - Ang kagamhanan sa  dakbayan sa Talisay posibleng moimplementar ug daku-dako nga multa batok sa mga mangubkobay og bas diha sa sapa sa Mananga.

Si Konsehal Antonio Bacaltos, Jr. ug Danny Caballero mibutyag nga padayon gihapon ang pagpangubkob og bas ug graba diha sa sapa sa Mananga ilabi na panahon sa ting-init.

Niadtong Agosto sa milabay’ng tuig, si Bacaltos mihangyo ni Mayor Johnny De los Reyes sa pagbutang og task force diha sa Mananga aron pagsikop sa  mga makalapas sa balaod sa kalikupan.

Ang Talisay City Ordinance No. 2005-23 nagdili ni bisan kinsa pagpanguha og bas ug graba gikan sa Mananga River sa Tabunok ug mitakda og P500 nga multa ug pagkapriso nga dili moubos sa usa ka  buwan ug dili usab molapas sa tulo ka buwan batok sa makalapas.

Apan si Caballero ug Bacaltos nagkanayon nga kinahanglan’g pabug-atan pa ang silot batok sa makalapas sa maong balaod kay daghan ang wala mahadlok sa mao nga silot.

Gipasabot sa duha ka konsehal nga makahatag og dakung kadaot sa kalikupan o diha sa Mananga ang pagpangubkob og bas ug graba.

Kapin sa 30 ka tuig na ang nakalabay, ang “temporary bridge” sa Mananga nahugno tungod sa walay hunong nga pagpangubkob og bas ug graba ug daghan ang nangamatay.

Naglaraw sila si Caballero ug Bacaltos nga isugyot ang paghimo og kausaban sa City Ordinance 2005-23 aron ang multa himoon na nga P2 mil o pagkapriso sulod sa usa ngadto sa tulo ka buwan sa una nga kalapasan; P3 mil o pagkapriso gikan sa tulo ngadto sa unom ka buwan sa ikaduhang kalapasan ug sa ikatulo’ng kalapasan multa nga P5,000 o pagkapriso gikan sa unom ngadto sa usa ka tuig o depende sa hukom sa korte.

Gilantaw nga ang multa nga makolekta gikan sa malapason ibutang og special account diin gamiton ra kini galastohan sa operasyon sa Task Force Mananga.  (BANAT NEWS)