Konsehal sa Lapu-Lapu nakalingkawas sa kamatayon
CEBU, Philippines - Nakalingkawas gikan sa kamatayon ang usa ka konsehal sa dakbayan sa Lapu-Lapu sa dihang giingong gipusil unta kini alas-2 pasado ang takna kagahapon sa hapon sud sa buwangan sa Mahayahay Cockpit sa barangay Gun-ob dakbayan sa Lapu-Lapu.
Si Konsehal Leo Mercado, 54, nga taga barangay Pajo ,dakbayan sa Lapu-Lapu ang gipusil sa iya rang kaila nga si Patrocinio Baring, 67, residente sa maong barangay.
Matud pa ni PO3 Lydo Pinos sa Homicide Section sa Lapu-Lapu City Police Office , si Mercado niadtong panahona padung mangasilyas dihang gisugat kini sa suspetsado ug gitionan og 9.mm caliber pistol . Dugang pa ni Pinos, si Mercado miingon nga gipangitaan siya og titulo sa yuta sa suspetsado maong gipangutana kini sa konsehal kung unsa nga titulo kay wa siya makasabot nganong gipangitaan siya og titulo.
Matud pa nga dihadiha gikablit sa suspek ang armas ug swerte na lang nga wa kini mobuto ug dali nga nakadagan ang konsehal pasud sa kasilyas apan dunay nakasangit sa lawas niini ug nalamba.
Dali usab unta nga mibiya ang suspek sa sabungan apan naabtan kini ni SPO4 Edgar Sagarino, ang City Executive Senior Police Officer, (CESPO) ug suod nga higala sa konsehal ug gipusil gilayon niini ang suspek sa iyang tuong bahin sa iyang paa ug sa tuong bahin sa iyang hawak. Dali usab nga gidala ang suspetsado sa Lapu-Lapu City Hospital, samtang na-recover sa mga sakop sa Police Station 3 ang .9 mm nga adunay lima ka buhing bala gikan sa suspetsado.
Samtang gi-surrender usab ni Sagarino ang iyang service firearm ngadto sa mga mirespondeng polis. (BANAT NEWS)
- Latest
