Ginang namatay sa kulata

CEBU, Philippines - Usa ka ginang ang namatay duha ka adlaw human siya gikatahong gibun-og sa iyang bana sud sa ilang panimalay diha sa sitio Kamangahan sa barangay Tabok, dakbayan sa Mandaue niadtong Huwebes sa buntag.

Si Jovelyn Ancero, 26,  patay na sa dihang nakit-an sa iyang manghod nga si Malen Sinangote, nga naghigda sa kama sa ilang kwarto. Padayon pa karong gipangita ang iyang bana nga si Arnel Ancero, 28.

Si Sinangote nangayo og tabang sa kapolisan sa Basak Police Station human nga wa na kini magginhawa sa dihang gipukaw aron unta pakan-on og pamahaw.

Matud pa ni PO3 Heracleo Gamboa sa Basak Police Station, nga niadtong Martes sa gabii  iyang nadunggan iyang maguwang ug ang bana niini nga naglalis gumikan kay matud pa buot unta sa asawa nga papulihon ang bana og bantay sa ilang usa ka tuig nga anak.

Apan nasuko hinuon ang bana hinungdan sa ilang grabeng panaglalis nga misangpot sa pagkulata sa bana sa iyang asawa.

Human kulataha ang asawa gibiyaan kini sa iyang bana ug milakaw samtang nagping-it sa kasakit ang ginang tungod sa mga bun-og nga iyang nahiagoman ug naglubog na lang kini sa kwarto. “Wa na siguro makaantos ang biktima sa kasakit ilabi na nga gamay pud kaayu siyang babaye,” si Gamboa nagkanayon.

Matud pa usab ni Sinangote ang bana sa iyang igsuon  wa na kini magpakita pa kanila.

Usa ka hot pursuit ang gipahigayon sa kapulisan didto sa balay sa ginikanan sa suspek sa dakbayan sa Bogo ug sa dakbayan sa Sugbu apan wa igkita ang suspek.  (BANAT NEWS)