P35M gigahin alang sa rehab ug recovery sa CV

CEBU, Philippines - Ang Department of Environment and Natural Resources kon DENR-7 mitagana og P35 milyones   alang na sa rehabilitasyon ug recovery program sa mga lugar sa Central Visayas nga naigo sa mga katalagman.

Gianunsiyo kini sa Regional Director sa DENR-7 Dr. Isabelo Montejo human masumitir ang ilang 2014 work and financial plan for rehabilitation programs ug gipaabot nga aprobahan kini  ni DENR Sec. Ramon JP Paje.

Base sa proposal ang mga lugar nga naapektuhan sa 7.2 magnitude nga linog ug bagyong Yolanda maoy prayoridad sa recovery program sama sa mangrove rehabilitation, plantation establishment ug beach type forest plantation. Nasayran nga sa P35milyones nga gitagana, P10 milyones niini ihatag sa probinsiya sa Sugbo, P16 milyones sa Bohol ug laing P6 milyones sa Negros Oriental ug P1 milyon sa Siquijor.

Ang DENR-7 una nang mipagawas og P20 milyones alang sa mga lugar nga naapektuhan sa katalagman sa amihanang bahin sa Sugbo alang sa cash-for-work program ug sa rehabilitasyon sa 85-hectares nga mangrove plantation sa Isla sa Camotes, Bantayan Island, Medellin, Bogo City ug Borbon. (BANAT NEWS)