Electronics traffic signal sa Mandaue nahuman na g’yud

CEBU, Philippines -  Ang siyam ka dagko’ng mga eskena sa dakbayan sa Mandaue natauran na g’yud og moderno nga electronic traffic signal systems ingon man 36 ka Close Circuit Television (CCTV) camera nga mo-rekord sa mga panghitabo sa palibot.

Ang kinatibuk-ang proyekto nga nagkantidad og P39.9 milyones gihimo sa Triune Electronic Systems Inc. sa tumong nga mapalambo ang pagpahapsay sa dagan sa mga sakyanan sa Mandaue.

Gawas nga ang mga motorista makabantay na kun kanus-a sila angay’ng mohunong ug mopadagan sa ilang sakyanan tungod sa digital numbers nga makita sa traffic signal systems, ang kontrata naglakip sa pagpahimutang og mga CCTV. Upat ka CCTV camera ang gipahimutang sa mata’g major intersection aron mokuha og footage nga magamit kun adunay aksidente nga mahitabo aron masayon ra ang pagsuta sa mga traffic investigator kun kinsa ang sad-an sa mga drayber.

Si  Peter Ong, presidente sa Triune Electronic Systems Inc., mitugyan na sa proyekto ngadto ni Mayor Jonas Cortes human mataud ang tanan’g gikinahanglan nga kahimanan subay sa kontrata.

Matud ni Ong nga bisan og gitugyan na sa ilang kompaniya ang maong mga traffic signal systems apan sila gihapon ang moatiman kun adunay maguba sa mga CCTV camera sulod sa usa ka tuig.

Sa mga electronic traffic signal lights napulo ka tuig ang garantiya sa kompaniya nga dili kini maguba. Ang mga major intersections nga gitauran sa mao nga mga traffic electronic control systems mao ang M.C. Briones ug dalan A.S. Fortuna sa Barangay Guizo,  eskina A.C. Cortes Avenue  ug dalan Sotero Cabahug sa Barangay Ibabao-Estancia, eskina A.C. Cortes Avenue ug dalan Plaridel sa Barangay Alang-Alang, eskina Catalino C. Ouano Avenue ug dalan Plaridel sa Barangay Cambaro.

Dugang traffic electronic control system ang gipahimutang sa eskina Sotero Cabahug Extention ug Ouano Avenue sa Sitio Tribunal, Barangay Centro, eskina A. Soriano Avenue ug dalan Mantawi Drive sa Reclamation Area, eskina C.D. Seno ug A. Soriano Avenue sa reclamation area, dalan J. P. Rizal ug U.N. Avenue sa Ibabao- Estancia ug eskina Plaridel ug U.N. Avenue sa Barangay Umapad, Dakbayan sa Mandaue.

Si  Ong mipasabot nga daghan ang kaayohan nga maangkon sa dakbayan sa hingpit na nga pagpahimutang sa traffic electronic control system ug naglakip na niini ang pag-promote sa maayong kahimtang sa dagan sa mga sakyanan. Si Mayor Cortes miingon nga ang traffic electronic control system nga nahingpit na sa pagpahimutang sa siyam ka intersections gitumong   aron pagpalambo sa pagdumala sa trapiko sa dakbayan.

Si Superintendent Crisaleo Tolentino, deputy director for operation sa Mandaue City Police Office (MCPO), miingon nga ang gipahimutang nga mga CCTV camera makatabang usab pagsulbad sa krimen sama sa pagpanulis, pagpanglabni ug  krimen nga mahitabo sa kadalanan.  (BANAT NEWS)