Hepe sa Talisay PNP gilabanan sa CPPO

CEBU, Philippines - Gilabanan sa kadagkoan sa Cebu Provincial Police Office (CPPO) ang hepe sa kapolisan sa dakbayan sa Talisay nga gusto’ng pahulipan sa katungdanan ni Mayor Johny delos Reyes.

Si Superintendent Renato Malazarte, ang deputy provincial police director, miingon nga maayo og performance si Superintendent Resty Santos sa pagdumala niya sa kapolisan sa Talisay.

Sumala pa ni Malazarte nga usa kini sa rason nga gidistino si Santos sa Talisay tungod kay maayo kini og performance didto sa mga dapit diin siya madistino kaniadto.

Ang dakbayan sa Talisay usa sa labing dako nga police station nga ubos sa pagdumala sa CPPO.

Gibutyag hinoon ni Malazarte nga bisan og maayo pa ang performance sa usa ka opisyal sa kapolisan mahimo gihapon kini nga balhinon sa laing police stations.

Matud ni Malazarte nga anaa ra ni Senior Supt. Noel Gillamac kun ibalhin ba niya si Santos tungod lang sa awhag sa mayor. Ang Republic Act 8551 adunay lagda nga ang mga mayor adunay katungod pagpili sa ilang “chief of police” ug pagparelibo niini kun wala na sila’y pagsalig.

Gipasabot ni Malazarte nga kun ilisan man si Santos mosumiter sila og lima ka ngalan sa opisyal sa kapolisan aron pilian ni Mayor JVR nga himoon niya’ng hepe. (Bryner L. Diaz/RUB)

Lolo ug teenager naghikog

Patay na nga napalgan ang usa ka tiguwang nga nagbitay sa punoan sa lubi didto sa Barangay Guiwanon, Ginatilan kaniadtong Martes sa buntag.

Si Sofio Letegio, 70, walay asawa, lumad nga taga lungsod sa Bindoy, Negros Oriental ug gitoohan nga naghikog kay may pisi nga gihigot sa iyang liog ug nagbitay sa lubi.

Ang mga polis ug ang Municipal Health Officer sa Ginatilan miingon nga walay timailhan nga gituyo pagpatay ang tiguwang.

Gikataho gani nga ang tiguwang miinom usab unta og kemikal nga pangpatay sa mga insekto tulo ka adlaw sa wala pa makit-i ang iyang patay’ng lawas.

Wala gayud mahibaw-i kun ngano nga ang tiguwang nagpakamatay.

Sa laing bahin, usa ka ulitawo ang napalgan usab sa iyang inahan nga nagbitay na sulod sa ilang balay didto sa Barangay Tuyan, Naga kaniadto gihapong Martes sa buntag.

Ang nagbitay na nga si Junson Abellana, 19, napalgan na lang sa iyang inahan nga si Lydia Daclan.

Gisuwayan pagdala si Abellana sa Minglanilla District Hospital apan patay na kining miabot sa maong tambalanan.

Wala usab matala sa record sa kapolisan ang hinungdan sa paghikog sa maong teenager. (BANAT NEWS)