Mga isda ug bakasi namalik na’s Cordova

CEBU, Philippines - Gituohan nga anam-anam na nga mibalik ang maayo nga kahimtang sa kadagatan sa Cordova nga naigo kaniadto sa “Oil Spill” tungod sa pagkalunod sa M/V Saint Thomas Aquinas.

Gani gitapuk-an na pagbalik sa mga tawo ang gipangbaligya nga bakasi, usa sa mga naapektahan kaniadto dihang mikaylap sa kabaybayonan ang lana gikan sa nalunod nga barko.

Matud ni Ronnie Pacaldo ug Demetrio Ybañez, mga mananagat sa Cordova, nga kanunay’ng mahurot ang gibaligya nila nga bakasi kay kinaham kini ilabi na sa kalalakin-an.

Si Michael Teves, taga dakbayan sa Talisay, mituyo pag-adto sa Cordova kauban ni The Freeman photographer Joy Torejos aron mopalit og bakasi.

Kinaham nila ni Teves ug Torrejos ang bakasi nga gibaligya sa kan-anan nga sagad dugokan sa katawhan, ilabi na ang mga turista, tungod kay giingong makapadugang kini sa kabaskog sa lalaki.

Ang bakasi nahanaw kaniadto dihang gihan-okan sa oil spill ang Cordova gikan sa nalunod nga barko sa 2GO Group nga gibanggaan sa M/V Sulpicio Express Siete didto sa Lawis Ledge.

Gitoohan nga ang gipahigayon nga clean-up drive sa mga molupyo, sa mga sakop sa Coast Guard ug sa 2GO Group maoy nakapadali nga mahanaw ang kadaut sa kadagatan.

Gi-hire sa 2GO Group ang Genetron nga usa ka eksperto sa oil spill cleanup ug mikontrata usab ang shipping company og ahensya sa Japan nga mosuyop sa migawas nga lana gikan sa barko.

Mga manginginhas sa Cordova misaysay nga nakamatikod sila nga anam-anam na nga namalik ang mga bakasi, kinhason ug ubang mga isda nga sagad nila makuha kaniadto. (/RUB)(BANAT NEWS)